TUARASCÁIL AN CHOISTE INIÚCHÓIREACHTA AGUS RIOSCA

Rinne an Ghníomhaireacht cónascadh ar na Coistí Iniúchóireachta agus Riosca a bhí mar dhá choiste ag an am agus cruthaíodh Coiste Iniúchóireachta agus Riosca le héifeacht ón 1 Feabhra 2017. Is é ról an Choiste cabhrú leis an nGníomhaireacht i maoirseacht:

• cháilíocht agus shlánaíocht na ráiteas airgeadais, in athbhreithniú agus i monatóireacht ar éifeachtacht na gcóras rialaithe inmheánaigh, an phróisis iniúchta inmheánaigh agus na feidhme comhlíonta, agus in athbhreithniú thorthaí an iniúchóra reachtúil; agus
• creat bainistíochta riosca na Gníomhaireachta lena n-áirítear an fonn riosca a leagan síos, comhlíonadh le rialachas rioscaí a fhaire agus ag cinntiú go ndéantar rioscaí a aithint, a mheasúnú, a bhainistiú agus a thuairisciú i gceart.

Tá ceathrar comhaltaí neamhfheidhmiúcháin na Gníomhaireachta ar an gCoiste:

• Martin Murphy, Cathaoirleach
• Maeve Carton
• Mary Walsh
• Susan Webb

Ceapadh Martin Murphy, Mary Walsh agus Susan Webb ar an gCoiste le héifeacht ón 1 Feabhra 2017. Ceapadh Maeve Carton ar an gCoiste le héifeacht ón 29 Márta 2017.

Bhuail an Coiste le chéile go foirmiúil sé huaire in 2017. Bhí seisiún oibre breise aige freisin chun athbhreithniú a dhéanamh ar na sonraí sna ráitis airgeadais agus bhí roinnt seisiún eolais aige ar shaincheisteanna gnó a bhaineann leis an gCoiste.

Tuairisciú Airgeadais

Rinne an coiste athbhreithniú ar dréacht-ráitis airgeadais 2017 agus mhol sé iad don Bhord. Díríodh san athbhreithniú ar chomhleanúnachas na gcur chuige sna ráitis airgeadais, meastacháin agus breithiúnais iomchuí, soiléire agus iomláine na nochtaí, agus forálacha ábhartha den Chód Cleachtais athbhreithnithe um Rialachas Comhlachtaí Stáit. Rinne an Coiste athbhreithniú freisin ar an Ráiteas Rialachais agus ar Thuarascáil Chomhaltaí an Bhoird, agus ar ráitis maidir le bainistíocht riosca lena gcuimsiú sa Tuarascáil Bhliantúil. Mar chuid dá athbhreithniú ar na ráitis airgeadais, bhuail an Coiste le hionadaithe Oifig an Ard-Reachtaire Cuntas agus Ciste (an t-iniúchóir reachtúil) chun Torthaí na Tuarascála Iniúchóireachta a phlé.

Rialú Inmheánach

Rinne an Coiste athbhreithniú ar éifeachtacht an chórais rialaithe inmheánaigh airgeadais. Rinne sé athbhreithniú freisin ar an Ráiteas maidir le Rialú Inmheánach atá le cur san áireamh i ráitis airgeadais 2017 agus mhol sé é don Ghníomhaireacht. Bhí treoir ag an athbhreithniú ó thuarascáil na bainistíochta maidir leis na dearbhuithe a bhí sa Ráiteas agus i gclár mionsonraithe oibre an Choiste freisin, lena n-áirítear iniúchadh inmheánach rialta, tuarascálacha riosca agus comhlíonta.

Iniúchadh Inmheánach

Fuair an Coiste tuarascálacha rialta ó Cheann an Iniúchta Inmheánaigh (faigheann Ceann an Iniúchta Inmheánaigh tacaíocht ó chomhlacht seachtrach, KPMG faoi láthair). Rinne sé athbhreithniú ar na príomhthorthaí ó thoradh na n-athbhreithnithe iniúchta inmheánaigh aonair a rinneadh faoi phlean iniúchta inmheánaigh riosca-bhunaithe 2017 agus rinne sé monatóireacht ar chur i bhfeidhm mholtaí an iniúchta. D’fhaomh sé plean iniúchta inmheánaigh rioscabhunaithe 2018 agus nuashonruithe ar an gCairt Iniúchóireachta Inmheánaí. Rinne an Coiste athbhreithniú freisin ar éifeachtacht na feidhme iniúchta inmheánaí agus mheas go raibh sé ag feidhmiú go héifeachtach. Buaileann an Coiste le Ceann an Iniúchta Inmheánaigh uair sa bhliain ar a laghad gan an bhainistíocht i láthair.

Tar éis próiseas tairisceana, ceapadh KPMG in 2014 chun seirbhísí iniúchta inmheánaigh a sholáthar ar feadh tréimhse trí bliana, agus an rogha ag GBCN síneadh a chur leis an gconradh ar feadh téarma breise dhá bhliain. Tar éis athbhreithniú ar fheidhmíocht KPMG, mhol an Coiste don Ghníomhaireacht go gcuirfí i bhfeidhm an rogha maidir le síneadh a chur leis an gconradh agus ceapadh KPMG ar feadh téarma breise dhá bhliain go dtí an 31 Deireadh Fómhair 2019.

Iniúchadh Reachtúil

Is é an tArd-Reachtaire Cuntas agus Ciste iniúchóir reachtúil GBCN. Rinne an Coiste athbhreithniú ar an bplean iniúchta sheachtraigh, ar na príomhréimsí fócais agus ar théarmaí rannpháirteachais an iniúchta. Rinne sé monatóireacht freisin ar fhreagairtí na bainistíochta do thorthaí an iniúchóra sheachtraigh ón iniúchadh a rinneadh ar ráitis airgeadais 2016. Buaileann an Coiste leis an iniúchóir seachtrach uair sa bhliain ar a laghad gan an bhainistíocht i láthair.

Riosca

Rinne an Coiste athbhreithniú agus mhol sé don Ghníomhaireacht nuashonruithe ar an mBeartas agus ar an gCreat Bainistíochta Riosca agus ar an gCreat maidir le Fonn Riosca. D’fhaomh sé freisin nuashonruithe ar roinnt beartas sonrach a bhain le riosca mar a fhoráiltear faoin mBeartas agus Creat Bainistíochta Riosca. Rinne sé monatóireacht ar sheasamh GBCN i gcoinne a fhoinn riosca sainithe agus d’fhaomh nuashonruithe ar an tsraith príomhtháscairí riosca. D’fhaomh sé freisin an Plean Gnó bliantúil maidir le Bainistíocht Riosca.

Rinne an Coiste athbhreithniú ar na príomhrioscaí atá os comhair GBCN bunaithe ar mheasúnú riosca straitéiseach agus thug sé tuairisc maidir le toradh a chuid athbhreithnithe don Ghníomhaireacht. Rinne sé athbhreithniú freisin ar na cláir rioscaí bunúsacha agus bhreithnigh sé tuarascáil maidir le creat tástáil faoi strus GBCN.

Rinne an Coiste athbhreithniú ar thuarascálacha rialta ó fheidhm Bainistíocht Riosca GBCN i dtaca le riosca airgeadais, fiontair agus infheistíochta. Rinne sé athbhreithniú ar éifeachtacht na feidhme Riosca agus mheas go raibh sé ag feidhmiú go héifeachtach.

Rinne an Coiste maoirsiú ar athbhreithniú ar Fheidhm Riosca GBCN (le tacaíocht ó thríú páirtithe seachtracha) i dtaca leis an gcur chuige straitéiseach is cuí agus ceanglais shonracha GBCN maidir le bainistíocht riosca i gcomhthéacs a spriocanna agus a chuspóirí gnó.

Comhlíonadh agus Nochtadh Cosanta

Rinne an Coiste athbhreithniú agus d’fhaomh sé nuashonruithe ar an mBeartas maidir le “Éagóiritheoireacht” a thuairisciú agus Nochtadh Cosanta. Rinne sé monatóireacht ar dhul chun cinn i gcoinne Phlean Comhlíontachta 2017. D’fhaomh sé freisin Plean agus Creat Comhlíontachta 2018, agus fuair sé tuairiscí rialta ón gCeann Comhlíontachta. Rinne an Coiste athbhreithniú ar éifeachtacht na Feidhme Comhlíontachta agus mheas sé go bhfuil sé ag feidhmiú go héifeachtach.

Eile

Chuir an Coiste roinnt gníomhaíochtaí eile i gcrích lena n-áirítear athbhreithniú ar chur i bhfeidhm GBCN ar an gCód Cleachtais athbhreithnithe um Rialachas Comhlachtaí Stáit, chomh réidh is atá sé don Rialachán Ginearálta um Chosaint Sonraí agus a bheartais agus nósanna imeachta maidir le soláthar chomh maith le machnamh a dhéanamh ar roinnt saincheisteanna sonracha gnó ó pheirspictíocht riosca de, lena n-áirítear maoirsiú ar thuairim ardleibhéil sheachtraigh maidir leis an bhfeidhm TFC lena chinntiú go bhfuil sé oiriúnach don fheidhm chun freastal ar cheanglais agus ar éilimh TFC GBCN i gcoinne an chúlra de luas an athraithe sa timpeallacht TFC sheachtrach go dtí deireadh 2020.

Rinne an Coiste athbhreithniú ar a fheidhmíocht i mí Eanáir 2018 agus thug sé tuairisc don Ghníomhaireacht maidir leis an athbhreithniú sin, ag rá go ndearna sé machnamh ar conas is fearr oibriú leis an nGníomhaireacht ar shaincheisteanna riosca.

TUARASCÁIL AN CHOISTE INFHEISTÍOCHTA

Is coiste reachtúil é an Coiste Infheistíochta a bhfuil foráil dó san Acht um Ghníomhaireacht Bainistíochta an Chisteáin Náisiúnta, 1990 (arna leasú).

Cuidíonn an Coiste leis an nGníomhaireacht maidir le rialáil agus bainistíocht Chiste Infheistíochta Straitéisí na hÉireann trí chinntí a dhéanamh maidir le fáil agus diúscairt sócmhainní taobh istigh de pharaiméadair a fhéadfaidh a bheith leagtha síos ag an nGníomhaireacht, ag cur comhairle ar an nGníomhaireacht maidir le straitéis infheistíochta an Chiste agus ag déanamh maoirseachta ar chur i bhfeidhm na straitéise infheistíochta.

Éilítear ar an gCoiste beirt chomhaltaí ceaptha den Ghníomhaireacht agus líon nach mó ná cúigear nach baill den Ghníomhaireacht iad a bhfuil saineolas ábhartha suntasach faighte acu agus atá ceaptha ag an nGníomhaireacht le cead an Aire Airgeadais (comhaltaí seachtracha) a bheith ann. Tá socraithe ag an nGníomhaireacht gur chóir triúr comhaltaí seachtracha a bheith ar an gCoiste. Is iad comhaltaí an Choiste:

• Susan Webb, Cathaoirleach (Comhalta Gníomhaireachta)
• Gerardine Jones (Comhalta Gníomhaireachta)
• Richard Leonard (comhalta seachtrach) Stiúrthóir Cuideachta agus iar-Chomhpháirtí, Grant Thornton Ireland
• Mark Ryan (comhalta seachtrach) Stiúrthóir Cuideachta agus Stiúrthóir Bainistíochta, Accenture Ireland
• Julie Sinnamon (comhalta seachtrach) Príomhfheidhmeannach, Fiontraíocht Éireann

Ceapadh Gerardine Jones ar an gCoiste le héifeacht ón 29 Márta 2017. Athcheapadh Richard Leonard agus Julie Sinnamon ar an gCoiste le héifeacht ón 27 Feabhra 2018.

Bhuail an Coiste le chéile 13 huaire in 2017. I measc phríomhghníomhaíocht an Choiste bhí athbhreithniú ar thograí infheistíochta mionsonraithe ón mbainistíocht. Tharmlig an Ghníomhaireacht cinntí maidir le tograí infheistíochta suas le €150m don Choiste. I gcás ina dtacaíonn an Coiste le togra infheistíochta níos mo ná €150m, déanann sé moladh maidir leis don Ghníomhaireacht. Rinne an Coiste monatóireacht ghníomhach freisin ar an bpíblíne infheistíochta gar do théarma d’fhonn aiseolas caoithiúil a thabhairt don bhainistíocht ar dheiseanna infheistíochta féideartha agus chun aon saincheisteanna dóchúla a phlé go luath sa phróiseas.

Rinne an Coiste athbhreithniú ar leasuithe beartaithe ar chreat chur i bhfeidhm thionchar eacnamaíoch CISÉ agus thug aiseolas don bhainistíocht, bhí an obair sin ag dul ar aghaidh isteach in 2018. Rinne sé athbhreithniú freisin ar an Straitéis Inbhuanaitheachta agus Infheistíochta Freagraí agus mhol sé leasú ar an mbeartas chun foráil a dhéanamh do chatagóirí infheistíochta áirithe a eisiamh ar bhonn teoranta agus ar fhorais infheistíochta.

De réir mar a bhogann CISÉ amach as a céim thionscnaimh agus de réir mar a théann a chuid infheistíochta i méid, tá monatóireacht ar phunanna mar chuid de ghníomhaíocht an Choiste níos mó agus níos mó anois. Déanann an Coiste athbhreithniú ar fheidhmíocht agus ar thionchar eacnamaíoch infheistíochtaí aonair in Éirinn, an Creat um Éagsúlú Punainne (lena n-áirítear teorainneacha infheistíochta agus leibhéil lamháltais), feidhmíocht na Punainne Domhanda agus cur i bhfeidhm na Straitéise Inbhuanaitheachta agus Infheistíochta Freagraí ar bhonn ráithiúil. Déantar athbhreithniú gach mí, ar an iomlán, ar fheidhmíocht, úsáid agus gníomhaíocht, agus déantar athbhreithniú faoi dhó sa bhliain ar chur i bhfeidhm na straitéise infheistíochta.

Rinne an Coiste athbhreithniú ar a théarmaí tagartha freisin agus mhol sé roinnt leasuithe beaga don Ghníomhaireacht. Thug sé faoi athbhreithniú ar a fheidhmíocht agus thug sé tuairisc don Ghníomhaireacht maidir leis an athbhreithniú sin. Mar chuid den athbhreithniú, d’aontaigh sé a chlár reatha faisnéise a leathnú ó shaineolaithe seachtracha i réimsí infheistíochta atá ábhartha don CISÉ.

TUARASCÁIL AN CHOISTE LUACH SAOTHAIR

Cuidíonn an Coiste Luach Saothair leis an nGníomhaireacht trí athbhreithniú agus faomhadh a dhéanamh ar bheartas luach saothair foriomlán GBCN, athbhreithniú agus faomhadh a dhéanamh ar aon scéimeanna pá a bhaineann le feidhmíocht atá á oibriú ag GBCN agus faomhadh na n-íocaíochtaí bliantúla iomlána a bheidh le déanamh faoi aon scéimeanna den sórt sin. Tugann sé moltaí don Ghníomhaireacht freisin maidir le luach saothair an Phríomhfheidhmeannaigh.

Tá ceathrar comhaltaí neamhfheidhmiúcháin ceaptha ag an nGníomhaireacht ar an gCoiste:

• Maeve Carton, Cathaoirleach
• Martin Murphy
• Willie Walsh
• Robert Watt

Ceapadh Maeve Carton mar Chathaoirleach ar an gCoiste le héifeacht ón 29 Márta 2017. Athcheapadh Martin Murphy agus Robert Watt ar an gCoiste le héifeacht ón 24 Feabhra 2018. Is comhalta den Choiste é Willie Walsh, mar Chathaoirleach ar an nGníomhaireacht, faoina théarmaí tagartha.

Bhuail an Coiste le chéile faoi dhó in 2017. D'athbhreithnigh agus cheadaigh sé an méid iomlán in íocaíochtaí a bhain le feidhmíocht a bhí le déanamh maidir le 2016. Rinne sé athbhreithniú ar na critéir bheartaithe chun comhaltaí seachtracha a cheapadh ar Choiste nua Straitéiseach GÉS agus na comhaltaí seachtracha atá beartaithe, sular cheap an Ghníomhaireacht iad. Rinne sé machnamh freisin ar na himpleachtaí do GBCN ó Bhille um Pá agus Pinsin Seirbhíse Poiblí a tugadh isteach i mí na Samhna 2017.

Rinne an Coiste athbhreithniú ar a théarmaí tagartha agus mhol sé roinnt leasuithe beaga don Ghníomhaireacht. Thug sé faoina chéad athbhreithniú ar a fheidhmíocht agus thug sé tuairisc don Ghníomhaireacht maidir leis an athbhreithniú sin i mí Eanáir 2018. Bhain an Coiste de thátal as go raibh sé ag feidhmiú go sásúil agus nár tháinig aon saincheisteanna chun cinn le cur faoi bhráid na Gníomhaireachta.

TUARASCÁIL CHOISTE NA GNÍOMHAIREACHTA UM ÉILIMH AR AN STÁT

Bunaíodh Coiste Straitéiseach na Gníomhaireachta um Éilimh ar an Stát an 1 Lúnasa 2017. Is é a cuspóir cúnamh a thabhairt don Ghníomhaireacht i bhfeidhmiú a cuid feidhmeanna Gníomhaireachta um Éilimh ar an Stát trí chomhairle agus treoir a thabhairt maidir le saincheisteanna straitéiseacha agus beartais i dtaca leis an nGníomhaireacht um Éilimh ar an Stát.

Tá seachtar comhaltaí ar an gCoiste: beirt chomhaltaí den Ghníomhaireacht, an Stiúrthóir, GÉS agus ceathrar nach comhaltaí den Ghníomhaireacht iad ach a bhfuil saineolas agus taithí ábhartha shuntasach faighte acu agus atá ceaptha ag an nGníomhaireacht le cead an Aire Airgeadais (comhaltaí seachtracha). Is iad comhaltaí an Choiste:

• Mary Walsh, Cathaoirleach (Comhalta Gníomhaireachta)
• Derek Moran (Comhalta Gníomhaireachta)
• Ciarán Breen (Stiúrthóir, GÉS)
• An tOllamh Sir Sabaratnam Arulkumaran (comhalta seachtrach) Ollamh Emeritus Obstatraice agus Gínéiceolaíochta ag St. George’s University of London
• Tom Beegan (comhalta seachtrach) Sainchomhairleoir riosca agus iar-POF an Údaráis Sláinte agus Sábháilteachta
• Donogh Crowley (comhalta seachtrach) Iarchomhpháirtí, Arthur Cox Solicitors
• David Moloney (comhalta seachtrach) Rúnaí Cúnta, An Roinn Caiteachais Phoiblí agus Athchóirithe

Seachas David Moloney a ceapadh le héifeacht ón 1 Nollaig 2017, ceapadh na comhaltaí le héifeacht ón 1 Lúnasa 2017.

Tháinig an Coiste le chéile uair amháin in 2017. Cuireadh siar dara cruinniú sceidealaithe an choiste in 2017 agus bhí sé ar siúl i mí Eanáir 2018. Is iad seo na príomh-mhíreanna a breithníodh ag na cruinnithe sin:

• Spriocanna rollacha gnó trí bliana GÉS;
• Saincheisteanna reatha agus sa todhchaí i dtaca le costais éileamh ginearálta agus cliniciúil;
• An cur chuige straitéiseach atá á ghlacadh ag GÉS maidir le roinnt maisghníomhaíochtaí suntasacha i gcoinne an Stáit; agus
• Na Cláir Bainistíochta Riosca Chliniciúil agus Fiontair le haghaidh 2018.